Øygarden kommune vedtok 23.06.2025 endring av detaljreguleringsplan for Gåsemyr.
Planendringa, utarbeidd av Ard arealplan as på vegne av B Telle Eigedom AS, gjeld bustadfelt ved Spildepollvegen. Delar av gjeldande plan var vanskeleg å gjennomføre på grunn av bratt terreng, og endringa legg til rette for ei meir skånsam gjennomførbar utbygging.
Bustadfelta B4 og B5 er teke ut og omdisponerte til eit større, samanhengande felles uteopphaldsareal. Samstundes vert det opna for fortetting i felt KBA gjennom bustader med mellom éi og fire bueiningar per bygg, innanfor ei total ramme på inntil 10 bueiningar. Det er krav om privat uteareal til kvar bueining, og store delar av det felles uteopphaldsarealet ligg skjerma i sør bak terreng.
Trafikktryggleiken blir styrkt gjennom ny gangveg i #1 og tilrettelagt kryssing over fylkesvegen (#2). Vendehammaren er flytta lenger vest, inn i delar av tidlegare B5, for å oppnå betre stigning og siktsforhold. Plangrensa er utvida for å regulere inn eksisterande avkøyrsle og sikre frisikt mot fylkesvegen. Renovasjonsløysing og tekniske areal er regulert som eigne føremål. Parkeringsløysinga i KBA er i tråd med kommuneplanen, der kvar bueining skal ha éin parkeringsplass på eiga tomt og éin plass på felles parkeringsareal innanfor f_PP3 og f_PP4.
Endringane gjev eit meir heilskapleg og landskapstilpassa bustadfelt med betre trafikktryggleik og eit robust grunnlag for vidare utbygging.
